Berria, 14 Maiatza 2013
Ostiralean kolpea eman, eta larunbatean hartu egin zuen Beñat Intxaustik Giroan. Maglia arrosa jantzita, eskas ibili zen erlojuaren aurka, baina egurrerako prest dagoela aitortu du. «Ordu eta erdiko entrenamendu lasai bat» egin, bazkaldu, lo kuluxka bat egin, masajea hartu eta afaldu aurretik erantzun dio Beñat Intxaustik (Muxika, Bizkaia, 1986) BERRIAren deiari. Ostiralean maglia arrosa jantzi ondoren, ezinean ibili zen larunbatean, erlojupekoan. 13. postuan ekingo dio Giroko zatirik gogorrenari, «konfiantzaz gainezka».